المواقف الواردة تمثل المواقف الخاصة لنشطاء الحملة الوطنية لمقاطعة انتخابات الكنيست. من خلال الكنيست، اسرائيل بتسن قوانين وقرارات الي بتأثر بشكل مباشر على حياة ١٢ مليون فلسطيني، داخل وخارج فلسطين التاريخية، بينما بتعطي لقرابة المليونين نسمة منهن حق شكلي,, حق في التصويت لتشكيل السلطة التشريعية فيها ، اللي ما بأثر على أجندات المشروع الصهيوني . وبالعكس هذا المشروع هو اللي بربح من خلال التصويت ... بربح تبييض صورته قدام العالم وبقوي ادعاءه بإنه نظام ديمقراطي. رغم انه الكل بعرف انو نظام ابرتهايد عنصري بطبيعته. الحديث عن حق التصويت بهيك نظام بيندرج تحت سياسة تشويه الوعي للفلسطينيين في الداخل واللي بيدعم خطاب المواطنة الي بيسعى لتقسيم وتشتيت الشعب الفلسطيني، هذا الموضوع اللي حملة المقاطعة بتحاربه. منقدر نتطلع عالمسار السياسي الحالي الي عم يتخذ قرارات بتهدد وحدة الشعب الفلسطيني من ضمنها صفقة القرن: صفقة القرن بتسعى توطين الملايين من اللاجئين في بلاد لجوئهن الحالية، وبهيك بتحطم نسيج الوحدة الفلسطينية اللي قدرنا نحافظ عليها خلال السبعين سنة الماضية، وبتسقط -بشكل مباشر- حق العودة وتقرير المصير، الاشي الي احنا بدورنا منرفضه ومنسعى لمحاربته من خلال المقاطعة .
